Logo

केकीले भनिन्- ‘अन्यायविरुद्ध न्यायालयको ढोकासम्म पुग्छौ’



कखरा संवाददाता


२९ साउन, काठमाडौं । अभिनेत्री केकी अधिकारीले अब हरेक अन्यायका बिरुद्धमा लड्ने बताएकी छन् ।

सामाजिक सञ्जालमा एक लामो स्टाटस पोष्ट गर्दै केकीले कहिलेकाहीँ बोल्नुपर्ने विषयमा समेत आफुहरु नबोलेको बताउँदै अबका दिनमा भने हरेक अन्यायका बिषयमा लड्ने बताएकी हुन् । अभिनेत्री पूजा शर्माको बिषयमा बोलेको र अभिनेत्री साम्राज्ञी आरएल शाहको दुव्र्यवहारको बिषयमा चुप रहेको भन्दै सामाजिक सञ्जाल र सञ्चारमाध्यममा अभिनेत्रीहरुको ग्रुपिजमको चर्चा हुन थालेपछि केकीले सबैको बिषयमा बोल्ने स्पष्ट पारेकी हुन् ।

‘राष्ट्रियस्तरका सञ्चारमाध्यमहरुबाट खुल्लमखुल्ला नेपाली महिला कलाकारहरुको शारीरिक बनावटमाथि छुद्र टिप्पणी गर्दा र संस्कारको मापदण्ड उनले लगाउने पहिरनसँग जोडिदिँदा हामीले जनाएको विरोधमा, तपाईहरुको प्रतिकृयात्मक विद्वता यस्तै वा यो भन्दा गम्भीर प्रकृतिको अर्को घटनामा किन बोलिन्स् भन्ने मै सिमित रहेको देख्दा अफशोच लागिरहेको छ’ केकी अगाडि थप्छिन् ‘ तपाईहरुको यस्तै टिप्पणीहरुले नै शायद पटकपटक घट्ने यस्तै घटनाहरु सामान्यीकरण हुँदा हुन् । कमसेकम एकचोटी साथ र समर्थन दिएर न्यायलाई स्थापित गराउन मद्दत त गर्नुहोस् ।’

आफूहरुसँग लड्नलाई धेरै मोर्चाहरु, विषयहरु समेत भएको बताउँदै केकीले भनेकी छन्– ‘सबै बेला उतिकै शक्तिशाली र ऐक्यताबद्ध भएर बोल्नुपर्ने विषयमा बोलेनौँ होला, लड्नुपर्ने मैदानमा लडेनौँ होला, अग्रपंक्तिमा उभिन सकेनौँ पनि होला । कमीकमजोरीहरु भए होलान् ।’ उनले एक मुठ्ठी सास र एक झिल्का आगो आफुहरुसँग भएको जानकारी गराउँदै त्यो सास, आगो भएसम्म लडने बताएकी छन् ।

नेपाली चलचित्र क्षेत्रका विद्वान टिप्पणीकारज्यूहरु, भन्दै सुरु गरेको लामो स्टाटसमा उनले कहिलेकाँही देखिने गरि आफुले पाएका मञ्चहरु लड्ने र कहिलेकाँही हात समाई पंक्तिबद्ध भएर न्यायालयको ढोकासम्म पुगेर लड्ने समेत उल्लेख छ । उनले अझ अगाडि लेखेकी छन्– ‘संघर्षका माध्यम र स्वरुप फरक भए होलान् । तर चिन्ता नगर्नुस्, हामी लड्छौँ ।’

प्रतिक्रिया दिनुहोस्