Logo

इरानद्वारा अमेरिकी सैन्य क्याम्पमा १२ वटा मिसाइल आक्रमण



कखरा संवाददाता


२३ पुस, काठमाडौं । आफ्ना उच्च सैन्य कमाण्डरको हत्याको प्रतिशोध लिने धम्की दिएको इरानले इराकमा रहेको अमेरिकी सैनिकको बेसक्याम्पमा ब्यालेस्टिक मिसाइल प्रहार गरेको छ । अमेरिकी रक्षा मन्त्रालयका अनुसार इरानले इराकमा रहेको अमेरिकी सैनिकको बेसक्याम्पलाई लक्षित गरेर एक दर्जन भन्दा बढी ब्यालेस्टिक मिसाइल प्रहार गरेको छ ।

इरानको राष्ट्रिय टेलिभिजनले सो आक्रमण अमेरिकी हवाई आक्रमणमा मृत्यु भएका विशेष सैन्य दस्ता कुड्स फोर्सका तत्कालीन प्रमुख कासिम सुलेमानीको हत्याको प्रतिशोध रहेको उल्लेख गरेको छ ।

गएको शुक्रबार इराकको राजधानी बग्दाद स्थित विमानस्थलबाट बाहिरिने क्रममा अमेरिकाले गरेको हवाई आक्रमणमा सुलेमानीको मृत्यु भएको थियो । अमेरिकी राष्ट्रपति डोनाल्ड ट्रम्पको आदेशमा भएको आक्रमणमा सुलेमानीको मृत्यु भएपछि रुष्ट बनेको इरानले त्यसको कठोर बदला लिने बताएको छ ।

इरानले इराकको अल–असदमा रहेको अमेरिकै सैनिकको बेसक्याम्पलाई लक्षित गरेर आक्रमण गरेको हो । सो आक्रमणमा कसैको ज्यान गए–नगएको स्पष्ट भएको छैन ।

इराकमा अमेरिकी सैन्य क्याम्पमा भएको आक्रमणबारे जानकारी रहेको र यसबारे राष्ट्रपति ट्रम्पलाई ब्रिफिङ्ग गरिएको राष्ट्रपति कार्यालय ह्वाइट हाउसले जनाएको छ ।

इरानको रिभोलुसनरी गार्डले आफूहरुको आक्रमणमा सुलेमानीको हत्याको प्रतिशोध रहेको जनाएको छ ।

इरानको सरकारी समाचार संस्था आइआरएनए मार्फत सार्वजनिक गरिएको रिभोलुसनरी गार्डको वक्तव्यमा भनिएको छ, ‘हामीले अमेरिका सबै सहयोगीलाई पनि चेतावनी दिइरहेका छौँ, जसले आतंककारी आर्मीलाई स्थान प्रदान गरेका छन्, इरान विरोधी गतिविधि भएका स्थानमा प्रतिशोधात्क आक्रमणको निशाना बनाइने छ ।’

इरानले बुधबार बिहानै मिसाइल तथा रेकट प्रहार गरेको हो । मंगलबार सुलेमानीको अन्तिम संस्कार भएको थियो । त्यसको केही घण्टापछि नै इरानले अमेरिकी सैनिकका केन्द्रलाई निशाना बनाएको हो ।

अमेरिकाले गरेको हवाई आक्रमण र त्यसमा सुलेमानीको मृत्यु भएपछि इरानसँगै मध्य पूर्वमा युद्ध हुन सक्ने खतरा बढेको छ ।

अमेरिकी रक्षा मन्त्री मार्क एस्परले इरानले सुलेमानीको मृत्युको प्रतिक्रियामा कुनै न कुनै प्रकारको प्रहार गर्ने यसअघि नै अपेक्षा गरिएको र अमेरिका इरानका हरेक आक्रमणको उपयुक्त जवाफ दिनका लागि तयार रहेको बताएका छन् ।

प्रतिक्रिया दिनुहोस्