Logo

४० जिल्लालाई पूर्ण विद्युतीकरण घोषणा गरिँदै



कखरा संवाददाता


२० पुस, एजेन्सी । मुलुकको ४० जिल्लालाई पूर्ण विद्युतीकरण घोषणा गरिने भएको छ । दक्षिण ललितपुर ग्रामीण विद्युत् सहकारी संस्था ले आयोजना गरेको कार्यक्रममा सम्बन्धित व्यक्तिले त्यसबारे जानकारी गराएका छन् । सहकारी संस्थाले ललितपुरको दक्षिण क्षेत्रका करिब ६ हजार घरलाई विद्युत उपलब्ध गराइरहेको छ । बाँकी रहेका करिब २ हजार घरमा छिट्टै वितरण गर्ने सस्थाले जनाएको छ ।

संस्थाको १८औं वार्षिक साधारणसभाको उद्घाटन गर्दै सांसद नवराज सिलवालले ललिपुरको दक्षिण भेग बत्तीमुनिको अध्यारोको रुपमा रहेको हुँदा विकासमा फड्को मार्न आफूले ध्यान दिएको जानकारी दिनुभयो । सामुदायिक विद्युत् उपभोक्ता राष्ट्रिय महासंघ अध्यक्ष नारायण ज्ञवालीले महासङ्घमार्फत मुलुकको ५३ जिल्लाका ३ सय सहकारी संस्था मार्फत साँढे ५ लाख घरधुरीमा विद्युत् सेवा पु¥याएको बताउनुभयो । ‘सरकारले मुलुकको ४० जिल्लालाई पूर्ण विद्युतीकरण घोषण गर्न लागेको छ’ उहाँले भन्नुभयो

नेकपाका ललितपुर जिल्ला इन्चार्ज हरि दाहाल, पूर्वसांसद सुशीला नेपालले दक्षिण ललितपुरका विद्युत सेवा नपुगेका स्थानमा विद्युत पुर्याउन सबैको ध्यान जानुपर्छ भन्नुभयो । संस्थाका संस्थापक अध्यक्ष डिल्लीप्रसाद घिमिरेले १८ वर्षअघि सञ्चालन गरिएको सो संस्थाका कारण आज दक्षिण ललितपुर क्षेत्रमा झिलीमिली बत्ती बल्न सफल भएको हो भन्नुभयो ।

संस्थाका लेखा समिति संयोजक नवराज महतले दक्षिण ललितपुर र गोदावरी नगरपालिका वडा नम्बर ७ देवीचौरामा संस्थामार्फत विद्युत् सेवा दिइरहेको बताउनुभयो । महाँकाल गाउँपालिकाका अध्यक्ष रामचन्द्र दाहालले संस्थाले देशका सहकारीलाई पाठ सिकाएर अघि बढिरहेको बताउनुभयो ।

कोञ्ज्योसोम गाउँपालिकाका अध्यक्ष गोपीलाल सिङ्ताङले संस्थाका कारण हाल दक्षिण ललितपुर क्षेत्रको ७५ प्रतिशत स्थानमा विद्युतीय सेवाको सुविधा पुगेको चर्चा गर्नुभयो । वाग्मती गाउँपालिकाका अध्यक्ष वीरबहादुर लोप्चनले दक्षिण ललितपुरमा थ्री फेज लाइन जडान गरी सिँचाइ र कारखानाको अवसर भित्र्याउन संस्थाका सदस्यलाई अनुरोध गर्नुभयो ।

नेपाली कांग्रेस ललितपुरका सचिव रविन्स शर्माले सबै दल मिलेर राजनीतिक प्रभाव नपर्ने गरी सहकारी संस्थामा नयाँ सदस्य चयन गर्न अनुरोध गर्नुभयो । संस्थाका अध्यक्ष गोविन्दप्रसाद बजगाईँले ललितपुरको १९ वडामा आफूहरुले सहकारी संस्थामार्फत विद्युतीय सेवा दिएको बताउनुभयो । ‘हामीले १८ वर्षअघि रु ८० लाख २६ हजार ऋण लिएर विद्युत् सेवा पु¥याउने काम गरेका थियौं’ उहाँले भन्नुभयो, ‘त्यसमा अहिले २६ हजार रुपैयाँ मात्र ऋण तिर्न बाँकी छ ।”

अनलाइनबाट विद्युतीय महसुल तिर्ने व्यवस्थाको शुरुआत गरिएको, २७ विद्यालयमा नवीकरणीय ऊर्जासम्बन्धी पाठ्यक्रम लागू गरिएको, उद्यमी महिलाका लागि संस्थाले कर्जा प्रदान गरिएको, महिलाई आत्मनिभर बनाउन संस्थाले अभिमुखीकरण कार्यक्रम गर्दै आएको, महाँकाल गाउँपालिकाको उन्यूचौरमा विद्युत् प्रवाहका लागि सस्टेशन निर्माण गर्ने योजना अघि बढाइएको संस्थाले जानकारी दिएको छ ।

प्रतिक्रिया दिनुहोस्