Logo

‘पार्टीभित्रको सानो कमजोरीलाई प्रतिक्रियावादीले उचाले’



कखरा संवाददाता


२० भदौ, काठमाडौं । पूर्व प्रधानमन्त्री तथा नेपाल कम्युनिष्ट पार्टी (नेकपा)का अध्यक्ष पुष्पकमल दाहालले पार्टीभित्रको एकतालाई सुदृढ बनाउनुपर्नेमा जोड दिनुभएको छ ।

अध्यक्ष दाहालले पार्टीले थप सफलता हासिल गर्न पनि आन्तरिक एकता थप सदृढ हुनुपर्ने स्पष्ट्याउनु भयो । बिहीबार पार्टीको विदेश मामिला विभागको पदस्थापन कार्यक्रममा उहाँले पार्टीको नीति र योजनालाई अन्तराष्ट्रिय क्षेत्रमा पनि अभियानको रुपमा संचालन गर्नुपर्ने आवश्यकता औंल्याउनु भयो ।

अध्यक्ष दाहालले प्रतिक्रियावादीहरुले पार्टीभित्रको सानो कमजोरीलाई उचालेर बदनाम गराउने कोशिस भइरहेको उल्लेख गर्दै सचेत रहन पार्टीका नेता, कार्यकर्तालाई आग्रह गर्नुभयो ।

पूर्व प्रधानमन्त्री तथा विदेश मामिला विभाग प्रमुख माधवकुमार नेपालले कम्युनिष्ट पार्टीलाई ककजोर बनाउने खेल विश्वका प्रतिक्रियावादीहरुले गरिरहेको उल्लेख गर्दै त्यसलाई निस्तेज पार्नेगरी पार्टीको वैदेशिक नीति तय गर्ने प्रतिवद्धता व्यक्त गर्नुभयो । मुलुकको राष्ट्रिय स्वतन्त्रता, स्वाभिमान र भौगोलिक अखण्डता नै पार्टीको पनि वैदेशिक नीति तय गर्ने मुख्य आधार भएको नेता नेपालको भनाई छ ।

प्रवक्ता नारायणकाजी श्रेष्ठले पार्टी एकीकरणको बाँकी काम छिट्टै सम्पन्न गरेर पार्टीलाई गतिशील ढंगले अघि बढाउन लागिएको बताउनु भएको थियो ।

प्रतिक्रिया दिनुहोस्