Logo

सँगै चियापान, अनि गोली हानाहान



कखरा संवाददाता


काठमाडौं । सदरमुकाम मुख्य बजारको परिश्चमतिर रहेको पान्धारे नामको होटलमा बुधबार बिहान सादा पोसाकका प्रहरी र चन्द्र समूहका जिल्ला नेता एउटै टेबुलमा बसेर चिया खाइरहेका थिए । दुवै जनाबीच पहिलेदेखि नै चिनजान थियो । भेट हुनासाथ हात मिलाए र चिया पिउन शुरु गरे । चन्द समूहका ओखलढुंगा जिल्ला इन्चार्ज नीरकुमार राई र सादा पोसाकका प्रहरी जवान सञ्जीव राई चियाको चुस्कीसँगै गफिदै थिए ।

प्रत्यक्षदर्शीका अनुसार नीरकुमार दुई दिनयता चिया पसलमा आउने–जाने गरिरहेका थिए । बुधबार पनि बिहानै आएर अरु मान्छेसँग ‘हेलोहाई’ गरिरहेका थिए । करिब साढे ८ बजे सञ्जीव आइपुगे । दुवैले ‘दाजुभाई’ को साइनो पनि लगाए । अभिवादन साटासाट गरे ।

सञ्जीव सुराकीका लागि चिया पसल छिरेका थिए । गफकै क्रममा नीरकुमारले सञ्जीवलाई भने, ‘विप्वलवको पार्टीमा लाग्यो भन्दैमा मलाई किन खेदो गछौ ? पार्टीमा लाग्नु आस्थाको कुरा हो ।’ सञ्जीवले सहज ढंगले उत्तर फर्काए, ‘हामी दुवै राई भएकाले भाइभाइ हो । के गर्नु र ?

सञ्जीवले यति भनेपछि नीरकुमार पिसाब गर्न जाने भन्दै पसलबाट निस्कन खोजे । सञ्जीवले नीरकुमारको पाखुरा समाते । ‘गफ गरौँ , तपाई कहाँ जान लागेको ? अहिले नजानुस्, अरु साथी आउदै छन्, ’ सञ्जीवलको भनाइ उद्धत गर्दै प्रत्यक्षदर्शीले बताए । दुवै जनाबीच तानातान भयो ।

चन्द समूहका हतियार बोकेका कार्यकर्ता दगुर्दै होटल अघिल्तिर आए । उनीहरु बीच गोली हानाहान भयो ।, कान्तिपुर दैनिकले समाचार प्रकाशित गरेको छ ।

प्रतिक्रिया दिनुहोस्